Tamil Language

தமிழ்மொழிப் பாடத்திட்டத்தின் வழி மாணவர்கள் : கேட்டல், பேசுதல், படித்தல், எழுதுதல் ஆகிய திறன்களோடு இருவழிக் கருத்துப்பரிமாற்றத் திறன்களிலும்  ஈடுபட பயிற்சி பெறுவர்.

கேட்டல்- கட்டளைகளைக் கவனமாகக் கேட்டு அதற்கேற்பச் செயல்படுதல், பேச்சுத்தமிழிலும் , எழுத்துத்தமிழிலும் அமைந்த பலவகையான பனுவல்களைக் கேட்டுத் தங்கள் புரிந்துணர்வை வெளிப்படுத்தக் கற்றுக்கொள்வர்.

பேசுதல்- படம் பார்த்துப் பேசுதல், பொருள் காட்டிப் பேசுதல், பாகமேற்று நடித்தல், தொலைபேசியில் உரையாடுதல், விவாதம் செய்தல் வானொலி அறிவிப்புச் செய்தல் போன்ற நடவடிக்கைகளின் மூலம் மாணவர்கள் பேசப் பயிற்சி பெறுவர்.

படித்தல்- தமிழ் எழுத்துகளை அடையாளங்கண்டு சரியாக உச்சரித்துப் படிக்கப் பயிற்சி பெறுவர். பல விதமான பனுவல்கள், கதைப்புத்தகங்கள், சஞ்சிகைகள் போன்றவற்றை வாசிக்கப் பயிற்சி பெறுவர். மேலும் வாய்விட்டுப் படித்தல், வாய்க்குள் படித்தல், அகன்ற படிப்பு மற்றும் ஆழ்ந்து படிக்கவும் கற்றுக்கொள்வர்.

எழுதுதல்- தெளிவாகவும் வரிவடிவம் சிதையாமலும் எழுதிப் பழகுவர். படித்த சொற்களையும் தொடர்களையும் நினைவுகூர்ந்து எழுதப் பயிற்சி பெறுவர். படம், படத்தொடர், சூழல் முதலியவற்றையொட்டிக் கதை அல்லது கட்டுரை எழுதும் திறனைப் பெறுவர்.

பேச்சுவழிக் கருத்துப்பரிமாற்றம்-  பொருத்தமான சொற்களையும் பலதரப்பட்ட வாக்கியங்களையும் பயன்படுத்தி, வகுப்பறைக் கலந்துரையாடல், பாகமேற்று நடித்தல், பேட்டிகள், வானொலிப் படைப்புப்  போன்றவற்றின் மூலம் தெளிவாகக் கருத்துப் பரிமாற்றம் செய்யக் கற்றுக்கொள்வர்.

எழுத்துவழிக் கருத்துப்பரிமாற்றம்- மின்னஞ்சல் எழுதுதல், பதிலுரை அனுப்புதல் , எழுத்துவழிக் கருத்துத் தெரிவித்தல், சமூக வலைத்தளங்களில் கலந்துரையாடல் போன்ற பல தரப்பட்ட எழுத்து வடிவங்களுக்கு மறுமொழி எழுதக் கற்றுக்கொள்வர்.

இன்றைய சூழலுக்கு ஏற்பத் தட்டச்சுப் பயிற்சியும் மாணவர்களுக்குக் கற்றுக்கொடுக்கப்படும்.

மாணவர்கள் மதிப்பு, பொறுப்புணர்வு, மீளும்தன்மை, நேர்மை, பரிவு, நல்லிணக்கம் முதலிய விழுமியங்களைப் பெற்று நல்ல பண்புநலன்களைக் கொண்ட குடிமக்களாகத் திகழவும் கற்றுக்கொள்வர்.